Посткризна рехабилитација - од МЦМС Извештаи за ситуацијата

26 ноември - 2 декември

Организацијата за храна и земјоделство при ОН – ФАО и Министерството за земјоделство, шумарство и водостопанство, земјоделските здруженија од Македонија, како и хуманитарните организации “Care” и “Acted” почнаа со дистрибуција на хуманитарна помош во добиточна храна наменета за 18.000 земјоделци од Куманово, Тетово, Гостивар, северниот дел на Скопје, како и подрачјата погодени од сушата. Вредноста на проектот изнесува 1,3 милиони долари и се реализира со финансиска поддршка на Холандската и Норвешката влада.

Организацијата CARE за 1500 семејства од липковско дистрибуираше по 150 килограми пшенична семка и по 150 килограми вештачко ѓубриво.

УНХЦР за жителите од Непроштено дистрибуираа дрва за огрев. Така за 172 смејства се доделени 345 кубици дрва. За секое семејство по два метри кубици.

МЦМС од 27 до 30 ноември дистрибуира 96,700 килограми сточна храна за жителите на селата во кризните региони. Во кумановскиот регион, дистрибуирани се 128 вреќи во Ново Село, 162 во Умин Дол, 190 во Љубодраг, 500 во Матејче и 121 во Отља. Во тетовскиот регион, 63 вреќи во Лешок, 127 во Непроштено, 252 во Теарце, 77 во Пршовце, 111 во Глоѓе и 203 во Доброште. Секое семејство добива по една вреќа сточна храна (50 кг).

19-25 ноември

Европската комисија ќе и додели на Македонија помош од 12 милиони евра за обнова на инфраструктурата и станбените објекти, оштетени за време на воените дејствија. Предвидено е 4,5 милиони евра да бидат наменети за обновување на електричната мрежа на 100 илјади корисници во Тетовско, Кумановско и Арачиново. Со доделените средства ќе бидат обновени 500 куќи, со што ќе се овозможи враќање на 3.500 раселени лица.

12-18 ноември

Во кумановскиот регион екипи на Електродистрибуција работат на поправка на електричната мрежа, каде веќе шест месеци селата од овој регион се без електрична енергија.

УНХЦР одобри 17 проекти од QIPs програмата.

5-11 ноември

CARE дистрибуираше 300 тони семе за пченица во регионот на Тетово.

CRIC дистрибуираше храна за животни за 300 земјоделци, со средства од ECHO.

29 октомври - 4 ноември

Екипи на “Електростопанство на Македонија” на 29 октомври вршеа увид на електричните мрежи во 16 села во општина Липково и регистрирање на оштетените далноводи и прекинати кабли. За да може да профункционира електричната мрежа и да се создадат нормални услови за живеење во овие села, се вршеше и нивна поправка и санација.

Координативното тело за справување со кризи, по направените проценки на стручните тимови, го презентираше Акциониот план за реконструкција на оштетените објекти во кризните региони, како и штетите во стопанството. Од проценките утврдено е дека вкупните штети изнесуваат 75 милиони евра, од кои 12 милиони евра се однесуваат на оштетувањата во енергетскиот систем, 3,06 милиони евра на патиштата и на железнишкиот сообраќај, 0,43 милиони евра на водоводната мрежа и 62 милиони евра на штетите направени врз градежните објекти.

На 2 ноември почна да сообраќа автобусот на УНХЦР во релација Куманово-Ваксинце-Лојане. Автобусот ќе сообраќа два пати на ден.

22-28 октомври

Амбасадорот на Европската унија во РМ, Хозе Пинто Тешеира, ги посети раселените лица од Кумановско-липковсклиот регион сместени во колективниот центар во Долно Коњаре. По тој повод на 100 жители им беше доделена хуманитарна помош во добиточна храна за добиток.

Екипи на Електростопанство на Македонија во текот на минатата недела вршат санација и поправка на оштетената електрична мрежа во кризните региони.

15-21 октомври

Организацијата за храна и земјоделство при Обединетите нации обезбеди дистрибуција на првите пратки со зимска семенска пченица и вештачко ѓубриво, помош наменета за македонските земјоделци од подрачјата погодени со веони дејства и суша. Проектот кој треба да започне утре е во соработка со Министерството за земјоделие, шумарство и водостопанство, земјоделските здруженија од Македонија и хуманитарните организации “Care” и “Acted”.

Организацијата за храна и земјоделие при ОН обезбеди 1,375,000 илјади долари за реализација на проектот. ФАО ќе учествува со 400,000 долари, додека остатокот од 975,000 долари ги обезбеди американската Влада, односно агенцијата “ОФДА”. Помошта е наменета за 13,600 земјоделски семејства од Куманово, Тетово, Гостивар, северниот дел на Скопје, како и за подрачјата погодени од суша. Овие семејства ќе добијат по 150 килограми семенска пченица и исто толку килограми вештачко ѓубриво.

МЦМС дистрибуираше 24 тона вештачко ѓубриво за селата Љубодраг, Умин Дол и Ново Село.

8-14 октомври

УНХЦР подготвува помош за жителите од Непроштено за обновување на добиточниот фонд што беше уништен за време на воените дејствија.

1-7 октомври

Европската Унија и Електростопанство на Македонија потпишаа договор за донација на 10,5 милиони евра, кои ќе бидат наменети за санација на штетите на електроенергетската инфраструктура, што беа предизвикани од воените дејствија во кризните подрачја.

24-30 септември

Експертскиот тим за проценка на штети, составен од претставници на Министерството за транспорт и врски во соработка со ИМГ, од 24 септември почна да спроведува активности во Липково, Слупчане, Тетово, Вејце, Лавце и Селце.

Досега е извршена проценка на 1.660 оштетени објекти, од кои околу 70% се оштетувања од прва и втора категорија, 20% се од трета категорија, а 10% се целосно уништени. До крајот на септември се планира да бидат завршени најприоритетните проценки, за да можат да се извршат подготовките за донаторската конференција, која треба да се одржи на 15 октомври во Брисел.

УНХЦР во соработка со Европска унија и други независни агенции за помош до крајот на годината планира да реконструира околу 1,500 куќи во кризните региони. УНХЦР ќе ги поправа помалку оштетените куќи, додека ЕУ ќе врши поправка главно на пооштетени објекти.

17-23 септември

Тимот за проценување на штети заврши со проценките во Арачиново, каде беа проценети 1.500 куќи. Претходно беа проценети штетите на 20 куќи во Лопате, 12 во Брњарци и 23 куќи во Мојанце.

Според првичната проценка на стручните тимови извршена во Теарце и Лешок, составена од повеќе стручни лица од повеќе министерства и од локалната самоуправа, во овие две села вкупно се оштетени 200 објекти. Причинетата штета се проценува на околу 15 милиони германски марки. Европската унија најави започнување поправки на оштетените куќи во воие две села.

УНХЦР од 21 септември почна со организирање автобуска линија за раселените лица до селата северно од Тетово, кон граничниот премин Јажинце. Превозот е организиран по барање на македонската Влада. Автобусите ќе собраќаат три пати дневно.

10-16 септември

Тимот за проценување штети досега во Арачиново има проценето околу 1.300 објекти.

Проценката за другите подрачја ја презеде ИМГ (Интернатионал манагменет гроуп)/ Меѓународна група за справување, која во соработка со Министерството за транспорт и врски, започнаа со проценки во Тетовско (Теарце, Леошок и Слатина) и Кумановскиот регион (Опазе и Лопате).

3-9 септември

Тимот за проценување штети до сега во Арачиново има проценето околу 600 објекти.

27 Август - 2 Септември

Владата на РМ, УНХЦР и ИМГ ги усогласуваат Стратегијата за реконструкција на објекти, како и форматите за проценка на оштетувањата.

20-26 Август

Во Арачиново, на 24 август, Ел Хилал почна да дели 420 душеци од УНХЦР за раселените лица кои се вратени во селото.

13-19 Август

По еднонеделна пауза УНХЦР/МЦМС ја продолжува прекинатата дистрибуција на пластичните церади во скопското село Арачиново.

6-12 Август

УНХЦР/МЦМС по дистрибуцијата на 1,500 пластични церади во Арачиново, на
03.08 привремено ја запре понатамошната дистрибуција, заради најновата ескалација на судирите во Скопскиот регион.

Постигнат е начелен договор за рехабилитација на куќите во село Арачиново и тоа: УНХЦР/МЦМС за категорија 1 и 2 (санација на мали оштетувања); УСАИД за категорија 3 (поголеми оштетувања); а ЕЦХО/Мовимондо за категорија 4 и 5 (значителни поправки или изградба на нови објекти). Мовимондо сеуште не може да ги започне активностите бидејќи не е регистрирана во Македонија.

23-29 Јули

Службата за комунална хигиена во Арачиново досега закопала 500 мрши од пцовисан добиток. Екипите отстраниле околу 80 тони расипана храна од домаќинствата и околу 150 тони ѓубре, градежен шут и земја.

16-22 Јули

Во Арачиново во моментот најголем проблем претставува водата и струјата. Испитувањата покажале дека во селото нема доволно хигиенска исправна вода за пиење, а нема ниту техничка вода. Една од основните причини за ова е и недостигот од електрична енергија. За делумно снабдување на жителите со вода за пиење, по нивното враќање во домовите, ќе се обезбедат цистерни.

9-15 Јули

Службата за комунална хигиена во Арачиново досега собрала околу 120 мрши од пцовисан добиток. Животните се закопуваат во специјални јами. Постои голема можност да се појават заразни болести во кризните подрачја каде што мршите не се отстранети.

3-8 Јули

Започната реконструкцијата на инфраструктурата во Арачиново. Во с. Арачиново екипите на ЈП "Електростопанство" почнаа да ги поправаат оштетените енергетски доводи од Скопје до населбата. Започната е проверка на системот за водоснадбување со хлорирање на водата од локалниот водовод во село Арачиново. Водата засега е забранета за пиење од сите извори и од локалниот водовод. Започната е санација на теренот со собирање на мршите од стоката. Потребна е итна реконструкција на амбулантата. Населението се уште не се враќа, чекајќи дозвола од Владата.